بال2019 صحيح كان الوضع مأزم لكن الحياة بلبنان كانت أحسن بكتير من هلق وكنا مفكرين إنو يمكن شي نهار البلد رح يظبط و”لبنان رح يرجع” و”الشمس رح تطلع”!
تعوا نتذكر ونترحم على إشيا كنا نعملا بال2019 بحياتنا ما تخايلنا رح نخسرها.
1- وقت كانو يفتحو المحلات 24/7 وما كان في أزمة كهربا أو مازوت.
2- وقت كانت تجي الكهربا 12 ساعة بالنهار ونبلش: يلعن هل دولة.
3- وقت كان همنا الوحيد نقطع عجقة نهر الكلب وجونية.
4- وقت كنا نسافر، شي تركيا، شي قبرص، شي أوروبا ونقعد نق على الفرق بين هل دول ولبنان: شو ناقصنا ما منصير هيك!
5- وقت كان الدولار على 1500 وكنا نشتري غراض بالشوال ونضل نق على الغلا: معقول جينز ب000 80.
6- وقت كانت أتخن فاتورة بالمطعم تطلع 000 500.
7- وقت كانت كل ضيع لبنان تعم بالمهرجنات كل صيفية.
8- وقت كان سعر ساندويش الطاووق عند ملك الطاووق 6500 ليرة.
9- وقت كان مشوار البحر كلور على بعضو مع الإكل والبنزين يكلفنا 000 100.
10- وقت كان السرفيس ب2000 ليرة والتاكسي ب8000 ليرة.
11- وقت كنا ننزل نسهر كل يوم وين ما بدنا من دون ما نعتل هم الأسعار، قطع الكهربا، كورونا أو حتى المشروب المضروب أو الأكل المسمسم.
12- وقت كانت محططات البنزين توزعلنا كبايات وصحون قزاز ليشجعونا نعبي بنزين من عندن.
13- وقت كنا نرجع من البحر وهمنا الوحيد مين بدو يسبق التاني ويتحمم قبل.
14- وقت كانت أزمة الزبالة أضرب شي كنا مفكرين رح نشوفوا بهل بلد.
15- وقت كان وج النحس يطلع على التلفزيون ويوعظ الشعب، نسمعوا ونضحك بدون ما ننسم.
16- وقت كنا نضهر ونكزدر بالسيارة بالليل حاطين أغاني على العالي من دون ما نعتل هم البنزين ونرج نزل “ستوري”.
17- وقت كنا نسمع الناس بعدا بتقول: الشغل ما شي الحل، مدبرين حالنا!
18- وقت كان حق مرطبان النوتيلا 7000 ليرة.
19- وقت كان سعر بوظة على تلجة 250 ليرة.
20- وقت كان همنا نشوف إذا الليلة الكهربا على الستة أو على تلاتة لنشوف إذا منفتحلا أو لاء.
21- وقت كنا ننطر حفل ملكة جمال لبنان كل سنة آخر الصيفية لنقعد مع العيلة ونحضروا ونتخانق على مين لازم تكون الملكة.
22- وقت كانت كورونا ماركة بيرة وبس.
23- وقت ما كان عنا هم نسأل قدي الدولار اليوم.
24- وقت كنا نقضيا بالمولات ونشتري الماركات العالمية على ال1500 من دون ما نفكر مرتين.
25- وقت كنا نشتري “بنادول” كل يوم وناخدو الصبح والضهر وعشية.
26- وقت كانوا يضووا الإشارات والطرقات وننزل على الجديدة وسن الفيل ونق من ورا عجقة الإشارات.
27- وقت كنا ناكل كل يوم دليفري، الصبح، الضهر وعشيي من دون ما نفكر بالأسعار.
28- وقت كنا نسمع هل جملة كل ما حدا يتجوز: عم نقسط شقة.
29- وقت كنا نسمع المغتربين عم بقولوا: لبنان بلد كتير غالي علينا، روحة على حيلا بلد بأوروبا بتكلفنا أقل بكتير.
30- وقت لي كان همنا الوحيد بس نسهر نلاقي محل ما بيصرعنا “بميغانا” و”ديسباسيتو”.
31- وقت كنا نروح على أشغالنا وجامعتنا كل يوم ونعتل هم العجقة لي ما بتخلص.
32- وقت كانت الناس رغم كل شي عايشة، مبسوطة، وعم تضحك!
الله لا يسامح كل حدا شال هل ضحكة عن وج هل ناس!
