جويل غسطين
بما إنو هيدا تالت لوكدوان منفوت فيه، بعتقد صار عنا فكرة كيف رح يتصرف اللبناني وشو رح يكتب على صفحات السوشال ميديا، وقبل ما بلش إكتب، رح اطلب من كل اللي بلاقوا نفسهم مستهدفين بالمقال، إنو يعملوا كومنت ويخبرونا أي فئة هني.
- الفئة الأولى: جماعة الإيجابية يللي شايفين انو اللوكداون كتير مهم كرمال نقعد مع حالنا ونكتشف مواهبنا الداخلية.
مش عارفة كيف بدها تبين مواهبنا الداخلية بين أربع حيطان.
- الفئة التانية: جماعة الحفاظ على البيئة والأم الطبيعة، يللي مصرين إنو الكرة الارضية وأخيراً رح تتنفس ورح تاخد فرصة من البشر ووساختهن.
بس إنو هيدي تالت مرة الارض بتفرص وبتاخد بريك، يعني مش كأن تو ماتش شوي؟
- الفئة التالتة: هودي الناس يللي بحبوا بقضوا وقت مع أهلهم ونعتبرين اللوكداون فرصة ذهبية كرمال يتقربوا من عيلتهم.
طبعاً مش مختلفين إنو العيلة كتير مهمة، بس هيدي المرة أنا رح أعرض إخواتي على موقع علي إكسبرس لأن رح صير مجنونة إذا بضلوا معي.
- الفئة الرابعة: هودي الناس يللي مصرين يعلموك الطبخ، على أساس ما في فيديوهات يوتيوب كرمال نتعلم تحضير الأكل.
مع العلم إنو إذا سكروا السوبرماركت، ماكسيموم رح ناكل مجدرة ورز ولبن.
- الفئة الأخيرة: وهيدي الفئة كارثة، لأن بضلوا ينقوا ويخبروا مشاكلهم على فايسبوك وتويتر، وبكي ونواح.
