جويل غسطين
لبنان كلو على بعضه فيو 5 مليون شخص، صار في شي 7 مليون مصاب بكورونا، وما حدا بيعرف ليش وكيف.
المهم، المواطن اللبناني نهفة بكل شي، حتى بالمرض. وبدل ما يمشي متل ما كل الشعوب عم تتصرف لتحد من الأزمة، بتلاقيه فاتح على حسابه.
بهيدا المقال، رح نعرض أنواع الناس بلبنان وكيف عم يتعاملوا مع كورونا.
- عندك أبو ربها يلي مش فارقة معه كورونا وبضل يختلط مع الناس بلا كمامة وبلا تباعد إجتماعي.
- في يلي بكون لابس الكمامة بس بعد ربع ساعة بيرتحلك وبشيلها، على اساس الكورونا عندها مبادئ وما بتعدي الأحباب.
- وفي يلي اكلوا الجيز بنظرية المؤامرة ومقتنع انو الكورونا اخترعوها الكفار كرمال يشكوا شريحة الكترونية بجسمه ويتحكموا فيه، يمكن لأن هو شخصية مهمة كتير بالحياة ولازم الحكومات العالمية تتبع خطواته.
- وطبعا في المسرسب، يلي زرب حاله بالبيت وعم يشرب ديتول صبح وضهر وعشية كرمال ما ينصاب، وهيدا الوحيد يلي رح ينصاب بسرعة بلا ما يعرف كيف.
- وطبعا ما مننسى ملك الدبكة والغاتو، يلي كان مفروض يطبق القوانين والإرشادات الصحيحة، ولكن فضّل يحفل مع حاشيته بتقطيع الكايك والرقص بالسيف والترس.
- واخيراً، عندك الشخص يلي نازل مواعظ بالناس وببهدلن على الطالع والنازل كرمال يلتزموا ببيوتن، وممكن تكون البهدلة علنية وجماعية متل مقدمات نشررات الأخبار “يا بلا مخ”.
