جويل غسطين
نهفات الإم اللبنانية ما بتخلص، هي نبع للحنان بس بذات الوقت نبع للتصرفات المهضومة والعفوية.
وبس تعصب، زيحوا من الدرب.. حتى لو إنت ما دخلك بالمشكل، إجباري إنت اللي تاكل البهدلة، ولهلق ما حدا من العلماء بيعرف ليش!
خلاصة الحديث، الإم بس يكون دايق خلقها من كترة الشغل أو مزعوجة منزوجها (اللي هو بيكن طبعاً)، بتصير تكب حكي طالع نازل متل:
- الله لا يخليني إذا بقعد دقيقة بهل بيت بعد ..
وطبعا من بعدها بخمس دقايق بتفوت على المطبخ بتكفي شغل ولا كأن صار شي.
- هودي الولاد ما بساعدوني بشي، مفكريني خادمة عندن ..
مع إنو من نص ساعة عرضتوا عليها المساعدة وهي ما قبلت كرمال ما تتعبكن.
- شو فارقة معه بيكن، آكل شارب نايم وأنا بركض بنضف ورا هالمقلعط.
ويا حرام يكون البابا صرله يومين نايم بشغله ومش عم يجب إلا تيتحمم وياكل.
- أصلا الحق على بيكن هو مغنجكن ..
بس لأن حدا منكن طلب ديليفيري وما قبل ياكل مجدرة من قبل بيوم.
- يلا بكرا بتعرفوا قيمتي بس موت ، أصلا انشالله بموت قريبا وبرتاح منكن ومن بيكن..
والسبب إنو قرروا الولاد يتعشوا برا.
الجدير بالذكر إنو البي رح تلحقه طرطوشة لو حتى كان ميت أو عايش بالغربة أو بالشغل، ويمكن البهدلة تطال بين الحما كمان، مين بيعرف.
