كلنا طلعنا بتاكسي أو بسرفيس ولو مرة وحدة بحياتنا، وكلنا عنا ذكريات غريبة عجيبة مع السواق، يلي او بخبرك قصة حياته أو بصير بدو يعرف قصة حياتك انت.
رح نشوف أنواع سائقي التاكسي والسرفيس بلبنان بهيدا المقال:
- يلي حزين ومكتئب وببكيك معه، مع العلم إنو انت أول مرة بتطلع معه واللي فيك مكفيك.
- يلي بحط أغاني وبولعها وبصير بدو ياك ترقص وتتفاعل مع الموسيقى يلي بتكون بتشبه صوت الخطية.
- في عندك هيدا اللي بدخن علبة كاملة من الدخان بأقل من عشر دقايق وبيجويك ريحة وممنوع تعترض لأن بعصب وببلش يحط الحق عالدولة (ما بعرف شو خص الدوة بالتدخين عكل الحالات).
- الشوفير المميز الي إذا ركبت معه بنت حلوة بصير يطير فيولة ويخبرها إنو هو مهندس وعندو شقق للآجار، وإنو رئيس الحكومة ما بيطلع ولا قرار بلا إذنه، كرمال يشك عليها للمخلوقة.
- الزلمي الكبير يلي بصير بدو يدبرك عروس لإبنه، لأن حسك بنت عالم وناس.
- الشوفير يلي ما بيترك حدا من شره، بسب للكل وبدوبل عن الكل وبالآخر بقلك “اخت هالنظام بهالبلد، فش قانون”.
- وأهم واحد هو الشوفير يلي سمعه خفيف، وبصير بدك تصرخ كرمال تدلو على الطريق، والمصيبة اذا سمع غلط واخدك على محل تاني.
